أسباب تساقط الشعر و علاجه

 تساقط الشعر مشكله بتقابل ناس كتير و بتسببلهم مشاكل مشاكل نفسية. في الموضوع ده هنتكلم عن أسباب تساقط الشعر و ازاي نقدر نعالجها.

١. ايه هي أسباب تساقط الشعر؟

تساقط الشعر ليه أسباب كتيرة جدا زي

• تساقط الشعر نتيجه هرمونات الذكوره و ده الي بيسبب الصلع عند الرجاله و بيحصل برده عند الستات ان خط الشعر يرجع لورا و ده ممكن يحصل بعد البلوغ أو يتأخر عن كده.
• الثعلبة البقعية و ده مرض مناعي بيصيب فروه الراس و بيعمل مناطق صلع في الراس أو ممكن يسبب يسبب صلع في الحواجب أو الرموش.
• تساقط الشعر نتيجه علاج اشعاعي أو كيماوي و في الغالب الشعر بيرجع يطلع تاني بعد ما العلاج بيقف.
• تساقط الشعر الكربي و ده بيكون نتيجه التعرض لصغط عصبي شديد أو مرض شديد أو سوء تغذية. برده ممكن يحصل نتيجه تغيرات هرمونية زي تكيس المبايض أو بعد الولاده أو انقطاع الدوره. كمان ممكن يحصل نتيجه أدويه زي أدويه الغده الدرقية أو أدويه السيوله أو أدويه التشنجات أو أدويه منع الحمل.
• سعفة الرأس و ده مرض فطري بيصيب فروة الرأس و بيعمل بقع بتكون خشنة و بتسبب الهرش.
• تساقط الشعر نتيجة شد الشعر زي من توكه أو غطا للراس.

٢. ازاي سبب تساقط الشعر بيتشخص؟

زي ما قولنا تساقط الشعر ليه أسباب كتيرة فالدكتور بيعمل فحص و بياخد تاريخ مرضي كامل من أدوية و أمراض سابقة أو عمليات أو  ضغط نفسي أو مرض عائلي و ممكن لو شك في مرض مناعي أو مرض جلدي يطلب ياخد عينة من فروة الراس.

٣. ايه هو علاج تساقط الشعر؟

بعد ما الدكتور بيحدد ايه هو سبب تساقط الشعر بيعالج السبب الأساسي.

فيه كريمات و بخاخات  بتستخدم زي بخاخ مينوكسيديل الي ممكن الدكتور يكتبه حسب الحالة.

ممكن الدكتور يكتب أدويه كورتيزون لو سبب تساقط الشعر مرض مناعي.

في علاجات تانية زي الليزر أو زراعة الشعر. زراعة الشعر بتكون عبارة عن نقل بوصيلات شعر من منطقة تانية زي الراس من ورا للأماكن الي فيها صلع و ممكن العملية تتكرر على حسب الصلع قد ايه.

٤. ازاي امنع تساقط الشعر؟

في شويه حاجات ممكن تساعد في تقليل تساقط الشعر زي:

• سيب الشعر مش مشدود بتوكه أو رباط أو غطا راس بيشد على الشعر.
• حاول على قد ما تقدر ما تشدش أو تلف شعرك.
• بعد ما تستحمي نشف شعرك بفوطه براحه من غير شد أو فرك الشعر بالفوطة.
• زود الأكلات الي فيها حديد و بروتين.
• حاول تبعد عن أدوات الكوافير زي السشوار و ادوات فرد الشعر لأنها ممكن تسبب تساقط الشعر.

اتمنى الموضوع يكون عجبكم و تكونوا عرفتوا أكتر غن تساقط الشعر و أسبابة و علاجة.