الكيتو دايت ايه مميزاته و عيوبه

 الكيتو دايت هو نظام غذائي للتخسيس الجزء الاساسي فيه بيكون دهون و نسبه بسيطه جدا كربوهيدرات و بروتين (لو هنبسطها موزه واحده في اليوم كده يبقى خدت الكربوهيدرات بتاعتك في اليوم). فكرته ان الجسم بيتحرم من المصدر الرئيسي للطاقه و هو السكريات او الكربوهيدرات فبيضطر يكسر الدهون لحاجه اسمها  اجسام كيتو عشان تبقى مصدر الطاقه و من هنا جيه الاسم

طيب ايه مميزاته و ايه هي عيوبه و هل هو نظام تخسيس كويس؟ ده الي هنعرفه

مميزات الكيتو دايت

  ١. بيجيب نتيجه: الناس الي بتمشي على الكيتو دايت بتنزل في الوزن بسرعه ( من نص كيلو ل ٥كيلو اول اسبوع و بعد كده ممكن من ٢ ل ٣ كيلو في الاسبوع

٢. مش ممل: باقي انظمه الدايت ممله عشان الواحد فيها بياكل اكل صحي انما في الكيتو دايت الاكل كله دهون الي هو كل الاكل الي طعهمه حلو زي الكفته و الطرب و النيفه

٣. بيشبع: معظم انظمه الدايت التانيه الناس بتشتكي منها انها جعانه معظم الوقت انما في الكيتو دايت الاكل معظمه دهون فالشخص بيبقى شبعان

عيوب الكيتو دايت

١. نعسان: الي بيمشي على كيتو بيحرم المخ من الكربوهيدرات فبالتالي بيحس انه عايز ينام كتير و يحس انه تركيزه قليل

٢. مشاكل للقلب: فيه دراسه وضحت ان الكيتو دايت بيزود الكوليسترول و نسبه الدهون الوحشه الي بتتجمع في شرايين القلب و ممكن تعمل ضيق فيها 

٣. مشاكل للكبد: الكبد هو الي بيكسر الدهون و في الكيتو بيبقى عليه حمل شديد فعشان كده لو حد عنده مشكله في الكبد ممكن يزودها

٤. نقص فيتامينات و معادن: عشاان الجسم بيبقى محروم من فاكهه و اكل كتير بيبقى فيه معادن و فيتامينات

٥. مكلف: زي ما قولنا امثله عن الكيتو دايت زي الطرب و النيفه انه اكل حلو هتلاحظ برده انه مكلف جدا و هو ده هيبقى اساس اكلك

٦. مش مدروس: الكيتو دايت كان معمول عشان يعالج الاطفال من التشنجات و متدرسش عشان يكون نظام تخسيس الواحد يمشي عليه فتره طويله.

اتمنى تكونوا عرفتوا أكتر عن نظام الكيتو دايت و مميزاتة و عيوبة. فية أنظمة تانية للدايت زي نظام الصيام المتقطع الي اتكلمنا عنه في موضوع تاني و هنتكلم عن باقي أنظمه الدايت في مواضيع تانية.